السلام عليكم ورحمة الله وبركاته
النهاردة موضوع جديد .. وبداية مختلفة ان شاء الله
موضوع النهاردة .. عبارة عن كلمة .. هيخرج منها جملة .. وهيخرج منها مستقبلنا كله ان شاء الله
عايز الناس تبص معايا كده .. وناخد بالنا من الجملة اللي جاية دي
“” وما نيل المطالب بالتمني … ولكن تؤخد الدنيا غلابا “”
طبعا اكيد كلكم عارفين الجملة دي
بس انا مش جاي اسألكم انتوا عارفينها ولا لا … انا هقولكم انا ليه جبت سيرتها … بإذن الله
موضوع النهاردة كله عن الجملة اللي فاتت دي
…..*…..*…..*…..*…..
سؤال … كل واحد فينا كان بيحلم بإيه وهو صغير ؟؟
اللي كان نفسه يبقى ظابط .. واللي كان عايز يبقى مهندس .. واللي دكتور
طب … كام واحد فينا احلامه اتغيرت بعد ما كبر شوية ؟؟
وانا صغير كان نفسي ابقى مهندس .. بس لما كبرت شوية اتغيرت فكرة المهندس .. وكان نفسي ابقى ظابط
طب … لما كبرنا وبقينا رجالة كبار وعاقلين .. نفسنا بقى نعمل ايه ؟؟
واحد يقولك … شقة و شغلانة و عربية و عروسة
طب لحظة … انت هتعمل دا كله ازاي … مفكرتش انك لما تخلص كليتك … هتعمل ايه بعد كده ؟؟
طب انت عايز ايه ؟؟ مفهمتش حاجة منك لحد دلوقتي
يا سيدي معلش اصبر .. هتعبك شوية .. ارجع معايا للجملة اللي كنت كتبتها بالازرق فوووق
ايون هيا دي
“” وما نيل المطالب بالتمني … ولكن تؤخد الدنيا غلابا “”
هل فعلا الجملة دي صح ؟؟ … هل فعلا لازم ناخد الدنيا ” كدهو ” … زي ما بيقولوا
هل في رايكم ان الانسان ميتمناش حاجة .. لكن ياخدها عافية كده او يسيبها للظروف ؟؟
في رأيي .. التمني من ضمن الحاجات الاساسية اللي بتدفع الانسان للنجاح
طبعا .. دا بعيد عن العوامل المحيطة بيه .. لكن خلونا نتكلم عن الاماني
…..*…..*…..*…..*…..
واحد صاحبي واحنا في غرفتنا العزيزة 513 .. فحصل موقف كده … فقولت يااااه كان نفسي اعمل كذا
قالي … منا كان نفسي اخش هندسة … فانا بصتله كده .. طب ايه جاب دي لدي ؟؟
فقالي .. مش كل اللي بنعوزه بنلقاه … بس الحمد لله
قعدت بعدها افكر مع نفسي في الجملة دي … طب وليه منحاولش نتمنى بجد و نحاول نحقق اللي احنا عايزينه ؟؟
ليه دايما سايبنها كده … يا اما بالبركة … يا اما بالعافية ؟؟
ليه يا جماعة مبنعملش خطة او قايمة ونكتب فيها كل اللي احنا عايزينه ؟؟
وتعملهاupdate بإستمرار
…..*…..*…..*…..*…..
يجي واحد يقولي انا عاملها في دماغي …. بس صدقني وهيا في دماغك مش زي لما تكتبها
لان اكيد اكيد في حاجات كتير هتروح من دماغك .. لكن لما تكتبها مش هيروح ولا هتنسى منها حاجة … ان شاء الله
نااااس كتير … مش عارفين هما عايزين ايه … وغيرهم عارف هو عايز ايه … بس مش عارف ينفذه
وغيرهم عارفين هما عايزين ايه ومحددين هدفهم .. بس مش عارفين قدراتهم
او … مش واثقين في قدراتهم اللي تخليهم يخاطروا و يحاولوا يعملوا الصعب
ليه دايما بتدي لنفسك رسائل سلبية … ليه دايما عندنا كلمة “مقدرش” .. و “مش هعرف” … و “صعب عليا ” .. ؟؟
هو طبعا … {وَلاَ تُلْقُواْ بِأَيْدِيكُمْ إِلَى التَّهْلُكَة} (195) سورة البقرة
بس ده مستقبلك وحياتك اللي لازم تسعى علشانها .. وتخطط ليها
انت فعلا لو تعرف انت بجد عايز ايه ؟؟ … اااااه لو نعرف قدراتنا … هنكسر الدنيا
…..*…..*…..*…..*…..
صحيح … ان مش كل اللي بنعوزه بنلقاه .. واللي مكتوبلك هتشوفه .. ومحدش بياخد اكتر من اللي مكتوبله
بس برضه :- {وَقُلِ اعْمَلُواْ فَسَيَرَى اللّهُ عَمَلَكُمْ وَرَسُولُهُ وَالْمُؤْمِنُونَ} (105) سورة التوبة
و كمان {إِنَّا لَا نُضِيعُ أَجْرَ مَنْ أَحْسَنَ عَمَلًا} (30) سورة الكهف
يا جماعة احنا عندنا طاقة مهولة … ياريت نستغلها صح … وبلاش نخليها ضدنا … ونفرغ الطاقة دي في اننا ندي رسايل سلبية لنفسنا او لغيرنا
بجد … بإيدك ممكن تصنع حياة كويسة ليك .. بإيدك ممكن تكون اسعد انسان على وجه الارض .. ان شاء الله
…..*…..*…..*…..*…..
يا شباب … من النهاردة مش عايزين حد عايش كده وخلاص
نفسي … نبقى كلنا ايجابين … كلنا نشجع بعض
اللي يقع مننا مش نقف … بس نحاول نشده معانا
نفسي كلنا من دلوقتي … محدش ينام .. مش قصدي منامش النوم بتاع السرير
لا … قصدي النوم بتاع الانتخه .. النوم بتاع الكسل
بجد نفسي
نفسي … نبقى احلى شباب في الدنيا ….. شباب المسلمين
نفسي … تبقى بلدنا “” مصر “” احلى بلد في الدنيا
نفسي اقول كلام كتييييير
بس شكلكوا زهقتوا مني
بس خلاص … انا خلصت
بس انا كده مقولتش حاجة … لسه في كلام كتييير
بس ايه فايدة الكلام من غير افعال
وايه فايدة العقل .. لو مشتغلش
…..*…..*…..*…..*…..
اخر حاجة
ياريت الناس تقول هي استفادت ولا لا ؟؟ .. ولو استفادت تقول هيا استفادت ايه ؟؟
هل فعلا … الكلام اللي انا قولته صح … ولا الناس كلها عارفة طريقها .. وانا الي مش عايش في البلد دي
ملحوظة : كنت عايز اتكلم شوية عن ازاي تعرف قدراتك ؟؟ … وازاي تحدد اهدافك ؟؟
وازاي تستفيد من وقتك ؟؟ وازاي نستخدم طاقتنا ونخليها ايجابية ؟؟
بس الوقت لا يسمح فقولت خليها في بوست تاني … ان شاء الله
…..*…..*…..*…..*…..
لكن كل اللي هقوله بس … اتفرجوا على حلقة “قوة الادراك” للدكتور ابراهيم الفقي
وان شاء الله هتستفادوا كتييير جدااااا
وهتلاقوا كل اللي عايز اقوله ان شاء الله
انا حاولت ارفعها … بس للاسف النت بطئ جداااا
هبعتها هنا -ان شاء الله- اول ما تترفع
…..*…..*…..*…..*…..
او تشوفوا حلقات عمرو خالد برنامج قصص القرآن
وخصوصا الحلقة الثامنة … اللي اسلام كان اتكلم عنها
واللي عايز ينزل الحلقات كلها من موقع عمرو خالد
…..
البوست ده كنت عايز اعمله .. والحمد لله عملته
وده رسالة لشخص معين
ياااارب بقى تفتح الحاجات ومش مشكلة نص ساعة في اليوم .. حلقة او كتاب
المزاكرة مش هتطير يعني .. واهو من ضمن الساعات اللي بتضيع في الجامعة
…..
يارب اكون قدرت اوصل او افيد اي حد بأي معلومة …. ياااااااارب
اللهم ان هذا عملا صالحا جعلته خالصا لك ولا اريد من ورائه شيئا … فتقبله مني يا ارحم الراحمين
سبحانك اللهم وبحمدك اشهد ان لا اله الا انت استغفرك واتوب اليك
….
يالا … اشوفكم بخير في البوست الجاي …. ان شاء الله
سلاااام
مان بجد كلامك جميل جدا و مفيد جدا جدا
بالنسبة لحلقات الدكتور ابراهيم الفقي علي فكرة موجودة تقريبا كلها علي يوتيوب
ايو يا مان هي دي البوستس استمر
بالتوفيق 🙂
“Hunikal”
شكرا يا حبي .. ايوا كده ارفع من معنوياتي
😀
انا قولت اعمل حاجة تفيد الناس .. واهو برضه داخلين على امتحانات
والناس محتاجه تتشحن شحنات موجبة
😀
….*…..*…..*…..
اه على فكرة دي حلقة الادراك للدكتور ابراهيم الفقي .. اخيرا عرفت ارفعها
بس صوت بس
حجمها 7.30 ميجا
يارب تفيدكم ان شاء الله
http://www.4shared.com/file/71454337/9654a2d0/_online.html
احم احم
أولا كدا الموضوع ده حلو جداااااااااا
وبجد ربنا يكرمك على شوية الكلام اللى قلته
هى الحاجة اللى طلعت فى دماغي أني أبقي أكتب عايزة أعمل ايه
بس اكتشفت حاجة حلوة قوى أن تقريبا كل أحلامي اللى على المدي البعيد مفيش عندي امكانيات حاليا عشان أعرف أحققها وده طبيعي لأنها بتعتمد على اللى هيحصلي قدام (زي حلم الشركة بتاعتي أنا وأصحابي 😀 )
فقلت بقي أخليني فى الحاجات اللى نفسي أحققها على المدي القريب
لاقيت ايه أنها كلها متمحورة حول كلمة واحدة أذاكر وأعرف وأنجح فى المرحلة اللى أنا فيها
والحاجات دي مش هتحتاج غير أني أذاكر وأذاكر بس مش أكتر
ودي لوحدها مشكلة 😀
أنا مش عارفة ايه اللى دخلنا فى الكلام ده
بالنسبة للجملة أنا بأقول أن الواحد يتمني حاجة يحط خطوات أنه ازاى يحقق الحاجة دي ويتوكل على الله ويبدأ ينفذها
وأهي جت يا ما جاتش بقي على رأي حماقى
بجد شكرا على الموضوع ده
عمل ريفريش للأحلام بتاعتي 😀
سلام
تصدق بالله يا اسلام
انا الايام ديه زباله بالبنسبالى
بسبب امنيه كان نفسى احققها بس مش عرفت ومش عاوز احاول وكلامك غاظنى جدا جدا
بس برضك مش هحاول
ساعات بتبقى باينه
وساعات مش بيبقى بادينا ساعات بيبقى حكم علينا
عموما بوست حلو فى اى موضوع تانى 🙂
شكرا يا مان علي رفع الحلقة
🙂
بجد يا بشمهندس التوبيك جامد انا كمان كنت عاوزة اشكرك على حاجه مهمه اوى انى بجداتغيرت جدا بسبب ال SESSION اللى سمعتهوللك بجدشكرا ليك و ان شاء الله اول لما اخلص الشغل اللى انا بعمله لازم تكون اول المدعوين
🙂
ياااااااااه
تصدقي انا كنت نسيت البوست دي
شكرا انك فكرتيني بيها
😀
العفو يا فندم على ايه .. دا شكرا ليكي انتي اللي حضرتي
ويارب تكون فادتك
وانا تحت امرك طبعا في اي حاجة
🙂
شكرا ليك انت يا بشمهندس لانك افدتنى
🙂
لا شكر على واجب
تحت امرك في اي وقت