السلام عليكم ورحمة الله وبركاته
ازيكم جميعا
🙂
امبارح قولت .. حد يشتري قلب ؟
وواضح ان الناس كلها راضية بحالها .. ومحدش عايز يشتري .. والمزاد لسه مفتوح على فكرة
😆
النهاردة بقى عايز اقول شوية كلام
مهم شويتين
وربنا يجعل كلامنا خفيف عليكم وتستحملونا
😀
اولا …. وقبل ما ادخل في موضوعي عايز اقول شوية حاجات حصلت للواحد ممكن لو حصلت لأي حد
هايخد في وشه ويتشائم .. ويسود اليوم على نفسه وعلى اللي حواليه
حصلت امبارح حاجة من افظع الحاجات اللي ممكن تحصل للواحد في حياته
من غير سابق انذار .. او اي حاجة
اختصارا
كملت يومي عاادي جدااا .. طبعا مخي مش بيبطل تفكير
سلبي + ايجابي ….. وخدوا بالكم من الحتة دي كويس ﻻن ده موضوعنا
المهم خرجت بره وﻻقيت رجلي مودياني عند معرض الكتاب اللي ورا البغل في المنصورة
روحت ولقيت ايدي رايحة عن قسم التنمية البشرية في المكتبة
ولقيتها بتطلع -اللي هيا ايدي برضه- كتاب للدكتور ابراهيم الفقي اسمه
التفكير السلبي و التفكير اﻻيجابي
جبته ومكنش ليا نفس اقراه .. بس جبته وانا عندي اقتناع اني هتغير بعد الكتاب ده
قولت قبل كده اني باخد كورس
Soft Skills & Communications
بصراحة كل مرة احساسي بيزيد وبتعلى طاقتي اكتر وبيزيد حماسي اكتر
مش عايز اقولكم انا كنت رايح امبارح وجوايا كمية طاقة سلبية
تكفي ال 25 طالب اللي كانوا قاعدين معانا .. واﻻنستركتور نفسه اللي واخد كمية دبلومات وشهادات في الموضوع ده
ﻻ حصر لها
راجل عظيم فعلا .. بيعرف ازاي يتعامل ازاي مع كل نفس موجودة في الحيز بتاعه
سواء -النفس دي- كانت محبطة .. متفائلة .. مخنوقة منه .. متضايق عموما .. مخنوقة من حياتها
امبارح .. كانت اجمد حصة حضرتها
🙂
بجد بجد في اثناء الكورس ولحد نهايته انا عمال بندمج وبصحصح .. وبفوووق .. وبنسى همومي وبفكر ايجابي جداا
وكل الطاقة السلبية اللي كانت جوايا اختفت
وده تأثير الراجل علينا كلنا طبعا
وان شاء الله البوست الجاية .. هتبقى عن التأثير على اللي حواليك
سواء صحابك او اللي تعرفهم واللي متعرفهمش …. من خلال تعاملاتك مع الناس
🙂
طبعا طوول الليل وانا ال 2 وﻻد التييييييت اللي عندي-كنت حكيتلكم عنهم قبل كده- كان عندهم ماتش مصارعة جوايا
😆
المهم ….. كان عندي تسليم تاسك مهمة جداا في المشروع النهاردة .. والمفروض اني هشرح للناس اللي معايا الكود اللي كتبته
بكل بساطة
نزلت الصبح عامل اني ناسي كل حاجة وﻻ اكن حاجة حصلت .. حضرت سكشنين من واقع 4 سكاشن المفروض احضرهم في 3 فترات
محدش يقولي ازاي
كان ﻻزم اخد غيابي في 4 سكاشن + المشروع .. والمشروع فترة لوحده خااالص
😆
…..*…..*….
المهم كان عندي ميتنج بس مش تبع المشروع .. كان مع ناس مهمين
اثناء انتظاري ليهم .. طلعت الكتاب كان معايا في شنطتي .. وقعدت اقرا فيه
من هنا بقى يبدأ موضوعنا فعليا
بكل بساطة الراجل (ابراهيم الفقي) من اول 15 – 20 صفحة
غير تفكيري تماما وثبتني على التفكير اﻻيجابي واللي المفروض اتعامل بيه في حياتي كلها
بكل بساطة
قالك ايه الحاجات اللي بتخليك -تدفعك- تفكر تفكير سلبي في حياتك كلها
- البعد عن الله سبحانه وتعالى
- البرمجة السابقة .. اللي انت اتبرمجت عليها وانت صغير .. وبقت عاداتك واللي بعد كده بقت طباعك
- عدم وجود اهداف محددة
- الروتين السلبي
- المؤثرات الداخلية
- المؤثرات الخارجية
- العيش في الماضي
- التركيز السلبي
- حالة المزاج المنخفض
- الصحبة السلبية
- بعض وسائل اﻻعلام
….
طبعا … يعني بعد اما تعرفوا الحاجات دي كلها وتأثير كل حاجة فيهم على البني ادم
حاجة واحدة بس منهم ممكن تخرب حياتك كلها -مش بس تبعد وتكره- ﻻ دي تخليك تنشر الكره ده في كل مكان على وجه اﻻرض
وبين الناس كلها
هتبقى انت بقيت عبارة عن طاقة سلبية ليها رجلين وماشية على اﻻرض
تخيل معايا بقى .. كل واحد فينا مشي بعكس ال 11 حاجة اللي موجودين فوووق
وكل واحد فينا يتخيل حياته عاملة ازاي بعدها
ويثبت -يفرمل- بقى على كده
وانا بقولكم اهو .. بإذن الله هتبقى الحاجة اللي انت عايزها بعد كده ان شاء الله
🙂
…..*……*….
انا تخيلت نفسي امبارح اني طلعت قلبي وبعته او رميته .. وعيشت من غير قلب .. وﻻ مشاعر وﻻ احاسيس
بكل بساطة .. حسيت اني همشي في الشارع وفي حفرة موجودة في جسمي
اعصابي باردة جدااا .. اللي هيتعامل معايا مرة او اتنين .. هيكرهني بعد كده ومش هيكلمني
ببساطة مفيش تعامل مع الناس .. ﻻن محدش هيرضى يتكلم معاك اطلاقا
بالظبط .. فاكرين الموضوع بتاع ازاي تبقى غلس
.. وحاجة من ضمنهم انك تغلس على واحد وهو بيكلمك في موضوع مهم
بإنك تقول نكتة .. او تقاطعه وهو بيتكلم .. ساعتها انا اضمنلك ان الشخص ده
هيكرهك
بكل بساطة برضه
هبقى انسان ملوش اي ﻻزمة في الحياة .. عايش علشان يعيش … وبس
انا تخليت نفسي كدا .. في الحالة اللي كنت فيها قبل الكورس طبعا
حسيت ساعتها ان خلاص حياتي كلها بقت جحيم …. طب ليه وعشان ايه دا كله ؟؟
……*…….*…..
فاقترحت على نفسي اني اقابل ناس مهمين واتكلم معاهم .. علشان نشوف ابعاد القضية
اختصارا للموضوع
اكتشتفت اني في ناس -من غير اي سبب- عندها حب السيطرة والزعامة والقيادة
وناس كتيير كده على فكرة
وبصوا بقى .. من اﻻخر .. دي النقطة التانية في موضوعي النهاردة
وبجد ركزوا شوية
هو انا لما اسأل اي واحد سؤال واقوله .. ممكن تقولي ايجابيات موضوع معين ؟؟
وافضل مركز معاه على الحاجت اﻻيجابية
وبعدين يطلع فجأة يقولي … طب ليه مبصتش على السلبيات
ايه ده ؟؟؟ لييييييييييه ؟؟؟ يا سيدي طب وليه نبص على السلبيات ونحبط نفسنا ونكره حياتنا
وبعدين التفكير الايجابي اللي كنت بتكلم عليه … وربنا كان كله على ارض الواقع وﻻ خيال وﻻ احلام
كله من الحقيقة
…..*……*…..
معلش اسمعوني واعصروا على الشاشة شوية لمون علشان الحتة اللي جاية دي خطييييرة
من فترة ليست ببعيدة كان في موضوع شاغل بالي كده ومحيرني وكنت محتاج حد .. يديني رأيه في الموضوع ده
وكمان اكون بثق فيه
” ليه الثقة ؟؟ “
- ﻻن مش اي حد تديله ودانك وتخليه يأثر عليك في اي حاجة في حياتك
- هتبقى فين شخصيتك انت لما كل من هب ودب ماسك ودنك وعمال يلعب في دماغك
- مهما كان الشخص كبير .. في حاجة عند كل واحد فينا اسمها ” التقبل الذاتي ” .. ان مثلا انت مش راضي عن شخصيتك وﻻ عن تصرفاتك وﻻ عن شكلك وﻻ عن حياتك
…
فـ اي واحد معندوش التقبل الذاتي ده هتلاقيه رامي ودنه مع كل الناس
ده يقوله كلمة حلوة تفرحه … وده يديله رأي يهدمله حياته كلها
طب مش واخدين بالكم .. انه مهما قال على نفسه انه عندي -بفتح النون وكسر الدال- ومخه تخين .. برضه معندوش شخصية
بدليل انه محاوش يفكر “ولو للحظة” في مشاكله ويحلها هو بنفسه
بدل اما يروح للاخرين مهما كانوا .. ﻻن اﻻخرين مهما كانوا مش عارفين كل حاجة عن مشاكلك وحياتك …. صح ؟
لمجرد انه شخص عايز ياخد رأي حد .. والمشكلة اﻻكبر انه زي ما قولت قبل كدا مش عارف هو عايز ايه ؟؟
عدم وضوح الهدف
فالبتالي .. اي حاجة هتحصل , هياخد رأي اي حد ويرميله ودانه .. حتى لو كان الشخص اللي هيديله النصيحة ده مش عارف جوانب القضية كلها
فييين شخصيتك انت ؟؟
انت لغيت نفسك من الحياة لمجرد انك بتمشي بأراء وتفكير واسلوب الاخرين في الحياة
عارفين ان كل واحد فينا مختلف تماما عن التاني
حتى لو كانوا في صفات بينهم قريبة من بعض اووي .. حتى لو كانوا اخوات .. بس في حاجات كتييير جدااا مختلفين فيها
وربنا خلقنا كده
…..*……*…..
نيجي بقى الشخصية القيادية واللي عندها حب الزعامة والقيادة
واللي اكتسبتها سواء من البيئة اللي عايشة فيها او اتربت على كده
المهم بقى …. الشخصية دي ادام هيا محطوطة في الموقف ده .. يبقى ﻻزم يكون عندها حسن تصرف
ازااااااااي
يعني مثلا .. ميحكمشي -مش يحكم- بمبدأ الباب اللي يجيلك منه الريح سده واستريح
احب اعرفكم اني بكره المبدأ ده جداااا .. واحب اعرفكم اكتر بالمبدأ ده وهو ما يسمى بمبدأ
الهروووب
” الهروب من الواقع واللجوء للافكار السلبية ظنا منا انها هتساعدنا في تجاوز مشاكلنا “
دلوقتي
- لو انا حبست نفسي في بيتنا .. واستسلمت للمشاكل .. وقولت خلااص مش عايز اشوف حد وﻻ اتكلم مع حد .. بذمتكم ده هروب وﻻ مش هروب ؟
- لو انا قعدت في بيتنا .. اﻻحساس السلبي هيزيد عندي وخلاص .. اذن انا استسلمت للواقع .. وكل سنة وانتوا طيبين بقى .. وابقى قابلني لو نجحت او شوفت نجاح في حياتك
- وﻻ تقدير وﻻ نجاح وﻻ تقدم .. وﻻ نجاح في حياتك وﻻ في اي حاجة
ليه كل ده ؟ علشان انت ماشي كده بمبدأ
الهرووووب
طبعا المناقشة كانت حادة جداا بيني وبين الشخصية القيادية العظيمة دي
ﻻن اصعب حاجة في الدنيا انك تقنع واحد مقتنع من جواه انه قيادي عظيم بإنه يغير اسلوبه ويغير تعاملات مع الناس ويغير طريقته في سرعة الحكم على المواقف وميمشيش بمبدأ الهروووب
ولو كان سهل اقناعه فعلا .. مكناش سمعنا عن “هتلر” وﻻ “رومل” .. وﻻ اي حد من الشخصيات القيادية العظيمة دي
🙂
…….*…….*…….
المهم اللي كسب في اﻻخر … طبعا هو اللي كان معاه الادلة واﻻقوال المأثورة
وانا كان معايا كتاب ابراهيم الفقي النهاردة في شنطتي .. وكنت في الكورس امبارح
وطوول الليل بقرأ .. رأي د.انيس منصور في المرأة
طبعا اﻻخير ملوش اي علاقة باللي قبله .. بس انا هشرحلكم ليه قريته وانا في الحالة دي
😆
– الراجل ده (انيس منصور)عمل فيا حاجات كتيير .. بس برضه بحترمه وبقرأله –
والرجالة دلوقتي هيدخلوا يسقفولي .. وصفافير بقى للصبح وهيييييييييه
😆
وغالبا البنات – اﻻنسات (الجنس اللطيف) هيكرهوا البلوج بعد البوست دي وغالبا هتتمسح من الريدر عندهم
ﻻنهم عارفين ان انيس منصور هو عدو المرأة
😆
ومن غير ما اقتبس حاجات كتير انا هجيبلكم اللي عجبني من رأيه واللي همشي بيه بعد كده
هنبتدي دلوقتي
- امراه فشلت في الحب ثم تبحث عن حب جديد: انها لا تعرف الحب
- حتى عالم النفس العظيم فرويد .. خدعته النساء
- الخداع والكذب والغرور: ليس عملا واعيا عند المراه.. انها الغريزه
- تحبها كثيرا تحبك قليلا, تكرهها قليلا تكرهك كثيرا
- من راي المراه ان لكل رجل غلطتين: كل مايقول وكل مايعمل
- الرجل هو الجنس اللطيف والمراه هي الجنس يالطيف
- لن تندم كثيرا اذا احببت اي شيء غير المراه
- نمله واحده تستطيع ان تفسد جبلا من السكر
- المراه عندما تطلب النصيحه, فانها تريدك ان توافقها علي رايها
- المراه التي تعتقد ان احدا من الرجال لايستحقها يمكن معها حق ولكنها سوف تنتظر طويلا
- يسعد المراه من يقول لها: انت قمر, مع ان للقمر وجهين فقط
- اسوا مافي الحب: المراه
- لم يعرف المراه من عرف الف امراه
- باذنيك تستطع بان تكسب المراه استمع اليها
- اذا قالت لك احبك: صدقها, اذا قالت: واكثر من نفسي: لا تصدقها
- هل هناك شيء لم يقله احد عن المراه؟ نعم: ربنا علي الظالم
- العدل ان يتساوي الرجل بالمراه, فقد حصلت علي اكثر مما تستحق
- من النادر الا تعرف المراه الحب, ومن النادر جدا اذا عرفته , ان تكون قد مارسته مره واحده
- اخطر امراه هي التي ليس لديها ما تخسره
- لاهي مكسب اذا عرفتها, ولاهي خساره اذا لم تعرفها
- اذا هاجمنا سكان الكواكب الاخري بالقنابل النوويه فسوف تموت كل الاحياء علي الارض الا: المراه والخنازير هذه حقيقه علميه
- خدعوها فقالوا لها: لا فرق بينك وبين الرجل
- المراه تختار من يختارها ………………. شاكك في دي .. وممكن يكون معاك حق لو هيا اصلا مكانتش بتحبه ﻻنها معرفتش الحب اصلا
- اذا امسكت المراه لسانها لحظه واحده وفرت علي نفسها سنوات من الندم ……. خطييييييرة جداا
اخر حاجة
- هناك طريقتان لمناقشه المراه: كلتاهما بلا نتيجه …. صح مليوووووووووووون في الميه
….
واللي مش مصدق .. يسيب ايميله في رد هنا .. وانا هكلمه بنفسي وأقنعه
وياريت تكون الناس فهمت حاجة من الكلام ده
وسوري على اﻻطالة .. بس انا شايف اني مقولتش حاجة غلط
وكان ﻻزم اشرح كل حاجة
واللي شايف حاجة غير اللي انا قايلها .. برضه ايميلك في رد هنا على البوست ولو مش عايز ردك يظهر
مفيش مشاكل .. انا مفيش رد بيظهر على اي حاجة هنا اﻻ لما اشوفه اﻻول
🙂
وانا معايا فيديوهات .. وكتب سوفت وهارد كوبي .. واي حاجة انت عايزها
بس قوووول
بس محدش يدخل الكلام ده من ودن ويطلعه من التانية
…..*……..*…..
ارجو ان الناس تفضل فاكرة الكلمتين دوول .. وميبقوش زي بوست عدت
اتدفنت في وسط الكلام .. وراحت مع اللي راح .. بس اللي عايز حاجة يقووول
سلام يا بشر
واقعدوا … بالعافية .. وتفكير ايجابي .. تفكير منطقي .. بلااش تحكم على المشاكل قبل ما تعرف ايه المشاكل اصلا .. بلااش الهروووب
…
Life is to short … To become any body else
The best thing about life … That u don’t know what is going to happen
Any one make out … What he thinks about
افكار اﻻنسان ومعتقداته .. هيا التي تصنعه
Think … Ask people … But take your own decisions
If you can DREAM it … You will do it
Can you fight?? … Then Fight your bad thoughts
You are the only one who can change his life … Just Start
Do not wait the chance … You can make it
NEVER … Back Down
NEVER …. Look Back
…..
اللي عايز من الجمل دي اكتر واكتر
🙂
اممممممممم
طبعا معنديش أى اعتراض على التفكير الإيجابي
وده شعاري فى الحياة بقالي مدة كبيييييرة وسط كل اللى بيحصلي
من أول بقي كلمة أنيس منصور
وزي ما توقعت وانا زي ما تقول كده بلمت 😐
أولاااااا يعني كده
“الخداع والكذب والغرور: ليس عملا واعيا عند المراه.. انها الغريزه”
اللى كاتب الجملة دي من الآخر واحدة كسرت قلبه
بس كده
أو يمكن ملوش أم فمفتقد حنانها
أو يمكن ميعرفش حاجة عن السيدة مريم
ولا عن السيدة هاجر ولا أمهات المسلمين ككل
واللى ربنا كرمهم
عشان يقول أن الحاجات دي غريزة فينا!!!!
أو يمكن ككل هو ما فهمش المرأة صح أصلا
بس مهما حصل مش هأقتنع بحاجة من اللى اتقالت دي
وبعدين يعني “رفقا بالقوارير”
أحنا مش شوية شياطين مهمتها فى الحياة أن أحنا نعذب باقي البشر
بالعكس أحنا بنتجرح بسهولة
ومهما حصل صعب حب رجل يفوق حب امرأة
وفى الآخر خالص
نركز أحسن فى إيجابيات الحياة
سلااااام
اولا .. انا اسف اني اتأخرت في الرد على حضرتك .. ودا لظروف قهرية جدااا
وهيا اني كنت في المستشفى امبارح .. وعندي ظروف ما يعلم بيها الا ربنا .. يمكن تكونوا حسيتوا اي حاجة هنا
بس والله دا ولا حاجة من اللي عندي .. ارجو تقبل اسفي
🙂
….
ثانيا .. شكرا جداا على ردك وعلى صراحتك وعلى مرورك هنا
🙂
وبأحييكي برضه انك واجهتي الموقف .. وانك رديتي رد زي ده
واختلاف الاراء لا يفسد للود قضية
😀
اسمحيلي ؟؟
حضرتك لما شوفتي انيس منصور والكلام بتاعه .. للاسف عايز اقول لحضرتك انك مأخدتيش بالك من الكلام اللي مكتوب تحت كلام انيس منصور
….
لان كلامه عمى عنيكي .. وهيعمي عين اي بنت .. وعلشان كده قبل الكلام بتاعه قولت
…
حضرتك .. اسمحيلي اقولك انك مقرتيش بقيت الكلام ويمكن كرهتي فعلا البوست دي
لان كلمات انيس منصور وقعت على حضرتك زي ما قولتي “اتصدمتي” .. وده انا عارف انه هيحصل مع اي واحدة تقرأ الكلمتين دوول
اسمحيلي برضه .. ارد على كلامك ؟؟
اولا .. انا قايل فوق
انا قولت الكلام ده عجبني انا !! … يعني انا اللي همشي بيه
مقولتش ان كل النساء كده .. وانا بحترم كل النساء .. وعارف كل الكلام اللي حضرتك لمحتي بيه
وعارف والحمد لله اكتر منه
…
حضرتك قولتي ان في واحدة كسرت قلبه .. او ملوش ام ومفتقد حنانها
انا اقولك بقى
من واقع خبرتي مع انيس منصور .. احب اقول لحضرتك اني معايا كتاب ليه نزل سنة
1989
يعني سنة محنا اتولدنا
والكتاب ده لسه موجود في المكتبات لحد النهاردة .. اسمه “مذكرات شاب غاضب ” .. وده كان مذكراته ايام الجامعة
🙂
انيس منصور عنده ام حنونة جداا , وعنده اب كمااان حنون جداا .. وكمان حب !! بس ملاقاش الشخصية اللي هتعرف تفهمه .. وانا مهما كتبت مش هعرف اكتب عنه اكتر من نفسه
..
بالنسبة لحتتة
في نااس معندهاش ام ولا اب .. وتلاقيهم حنينيين جداا .. ومشاعرهم كبيرة
وفي ناس برضه عندها ام واب وخالة وعمة واخوات بنات .. وبرضه مشاعرهم اقل ما يقال عنها انها في تلاجة علطوول
😀
كل واحد رئيس جمهورية نفسه .. وانا لتاني مرة بقول لحضرتك انا كتبت الكلام ده لنفسي وانا همشي بيه .. ومقولتش ان النساء كلهم زي بعض .. ولا كلهم شياطين .. الراجل (انيس منصور) ليه وجهات نظر .. واثبتها في كتابه وانا مقتنع بيها جداا .. مش كلها ولكن اغلبها
..
وبرضه كل الستات عندهم نظرية انهم ارق المخلوقات .. انا معاكي انهم ارق المخلوقات
بس برضه الراجل ليه مشاعر واحاسيس .. ويمكن اكتر بكتير من المرأة
🙂
زي ما في رجالة معندهاش مشاعر .. زي ما في ستات معندهاش مشاعر ولا احاسيس
..
البنت لو اتجرحت .. هتقعد يومين ولا حاجة .. وبعدين هتروح تقعد قدام المراية .. وتحط “مكياج” .. هتبقى زي الفل .. وهتنسى .. ويمكن تلاقيلها عريس بعدها بيومين او تلاتة
😆
…
لكن الولد لما بيتجرح .. بيقعد حابس نفسه يوم يومين اسبوع مبيكلمش حد .. “ويمكن يروح المستشفى كمان” .. وارد وبيحصل
😆
ولو جه قعد قدام المراية وحط مكياج .. اهله هيقولوا ان اكتئابه اتحول لجنان .. ويودوه مستشفى المجانين
😆
.. لحد اما يجي اصحابه ويشيلوه من سريره
وياخدوه يلعبوا بينج او بلاي ستيشن .. علشان يخرجوه من الي هو فيه
😀
….
ونظرا لاني طولت في الكتابة .. انا ممكن اكتب لحضرتك “كتابين” في المشاعر والاحاسيس .. ومعايا اثباتات ان الراجل “بني ادم” .. وبيحس .. وبيشعر .. وعنده غدة درقية بتنزل دموووع برضه
ومش زي ما كل النساء مقتنعين .. انه علشان راجل ميتأثرش بالمواقف .. ولا ينزل دمعة واحدة من عينه
والدموع دي للنساء فقط
لا لا لا
ولو برضه عايزين اثباتات اجيبلكم
🙂
المهم … اني مكنتش كاتب الموضوع ده علشان انيس منصور وتجاربه .. ولا علشان سواد عيونه
يمكن لو كان عرف سنة 1989 ان في واحد اسمه “اسلام” هيقرا كتابه ده في يوم من الايام
يمكن مكنش نزله من اساسه
😆
انا كتبت الموضوع ده
علشان
اسف على الاطالة .. وشكرا على جرائتك في الرد
🙂
وزي ما قولتي .. ياريت نركز احسن في الايجابيات
نورتي
🙂
أولا
ألف سلامة عليك
وإن شاء الله تخف بسرعة
ثانيا
مش عارفة ليه حضرتك فهمت الوضع غلط أصلا
أنا اعترضت على وجهة النظر دي
سواء حضرتك مقتنع بيه وناوي تمشي عليها ولا لأ
هى كده أو كده مش صح
ومينفعش تتعم
أصلا فكرة أنك تعمم صفة على مجموعة من المتغيرات غلط جداااا من وجهة نظري
ثالثا
مش معني أني قلت رفقا بالقوارير
بما أنه حديث يعني
أني بأقول أن الرجالة معندهمش دم
أو ما بيحسوش
بس معروف أن أحنا بنتأثر أكتر
أو جايز عشان أنا ما بحطش مكياج
فلما بأكتئب ممكن أفضل مكتئبة سنة ولا حاجة 😀
وفى الأخر خااالص
دي إختلاف فى وجهات النظر مع الكاتب أولا
ومعاك أنك اقتنعت بيها ثانيا
بس دي حرية شخصية فى التفكير
وحاجة أخيرة
لأ قبل أخيرة
العفو 🙂
وعلى فكرة قرأت الموضوع للآخر من أول مرة
بس ركزت على الحتة دي عشان دي اللى اعترضت عليها
وأخيرا بقي
شكرا على الرد عموما
وسلاااام 🙂
بوست طوييل .. وحلو .. ومفيد..وانا قريته كله والله 🙂
طبعا انا مش هعلق ع الحتة بتاعة المرأة دي…لأن انا اصلا بحترم انيس منصور طول ما هوا مش بيكلم ف الموضوع ده…بحس انه مابيفهمش فيها بصراحة 😀
الحتة بتاعة ما تسيبش ودنك لأي حد دي ..صح جدا
شكرا ع البوست ده ..سلام 🙂
شكرا جدااا جدااا جدااا .. واتمنى فعلا ان كل اللي قراه البوست ورد – او مردش – او مش عايز يرد .. انه فعلا يكون استفاد منه
🙂
وياريت تمن الاستفادة دي
متخافوش مش فلوس .. انا كل اللي عايزة دعوة حلوة وخلاص
🙂
اي حد بيرد هنا .. رده على عيني وعلى راسي وليه كل الاحترام والتقدير
ورد حضرتك على عيني وعلى راسي
🙂
وزي ما قولت قبل كده .. كل واحد رئيس جمهورية نفسه .. واختلاف الاراء لا يفسد للود قضية
🙂
نورتي يا فندم