هلاوس
شوية هلاوس حصلت في الفترة الأخيرة حابب اوثقها علشان اي سبب هيحصل بعد كدا
تحذير : لو وراك حاجه مهمة ابقى تعالى اقرا الهلاوس دي بعدين .. بس اوعى تنسى
..
– بروح احضر درس دين كل تلات بعد صلاة العشاء … بس مش عارف استمر وﻻ اواظب فيه
مع ان في حاجات كتير مواظب عليها زي اني ﻻزم افطر كل يوم مثلا !!
زعلان من نفسي جدا
..
– المفروض ان لينا جيم تبع الشغل ، والمفروض اني كنت بروح اجري والعب سويدي ..
بس الشهر اللي فات دا تقريبا مروحتش اﻻ مرة تقريبا ومقضيها بالحديد اللي في البيت
..
– بقى عندي اختراع جديد في حياتي اسمه (ليلة الخميس) .. ليلة الخميس عندي هي ليلة لعب الكورة من 9 الى 11 مساءا
والحمد لله بقالي شهر وشويه مواظب عليها
..
– امي وابويا زعلانيين مني علشان عايزيني اتجوز .. بس انا مش عايز !!
هو الناس كلها عايزاني اتجوز ليه !؟هو في ايه ؟ .. هو ليه موضوع جوازي دا بقى مطلب شعبي ؟
انا هتجوز لما اكون عايز اتجوز .. شكرا
– امي زعلانه برضه علشان موضوع الجواز .. انا قولت الموضوع دا قبل كدا ؟
اه .. وانا خايف اووي من الأجازة اللي جاية ، ربنا يستر وملاقيش نفسي قلعت الدبلة بتاعت مصر ولبست دبله تانية
– اه صحيح .. هي الدبله بتاعت مصر فين ؟؟؟
..
– شيخ الجامع اللي جمبنا اتكلم في الجمعتين اللي فاتوا عن سيدنا ربيعه بن كعب الأسلمي ، وجاب سيرة الجواز برضه وحكى قصته لما اتجوزبالصدفه بعد ما رجعت من الخطبة دخلت ودورت في الشيخ جوجل ولقيت درس ل د. عمرو خالد عن سيدنا ربيعه (رضي الله عنه ) ورفعتها على ساوند كلاود لو حد حابب يسمعها
سيدنا ربيعة بن كعب الأسلمي – عمرو خالد
دماغي بتلف وتدور بعد القصه الجميلة دي
بس يا ترى ..
هل لسه في ناس دلوقتي لو روحت لبنتهم هيقولولي “كثير طيب” ؟؟ وﻻ هيقولولي منعطلكش ؟؟
طب يا ترى بنت الحلال اللي انا (هدور) عليها دي
هترضى بواحد مجنون زي حلاتي ؟؟ ……….. مش عارف
..
– من يومين اخدت بعضي وطلعت على البحر علشان كنت مضايق اووي .. للاسف اتضايقت اكتر
الناس كلها كل واحد واخد مراته وعياله وطالعين يهيصوا .. طب هو مفيش مكان للعزاب ليه ؟
..
– منكرش اني اتغيرت كتيير في الغربه ، وفي حاجات كتير اتغيرت مش عارف للأسوا ولا للأحسن
بس الشئ اللي اتغير فيا تماما : اني بكره اي حد يكسر عليا حتى لو انا مش مستعجل
مش عارف دي حاجه جديده وﻻ قديمه .. بس يمكن علشان مكنتش مهتم بالسواقه قبل كدا اصلا
..
– كل اللي عرفوا اني نازل اجازة قالولي : اوعى تنزل الوضع مش حلو وقعدوا يكئبوني … ابوس ايديكوا العملية مش ناقصاكوا خالص
ما وضعي هنا انيل برضه يعني .. انزل افك شويه مع اصحابي بقى
..
– اني اخرتك يا وطني .. حبا وطواعية
..
– مكتئب من موضوع معين كدا حصل
اول محاولة من محاولات الفلسعه باءت بالفشل .. يارب اكتب لي الخير حيث كان وارضني به
..
– في قرار مصيري كدا عايز اخده
اني ابطل اعمل شغل فري لانس في السعودية
ليه ؟؟؟ …. بعدين بقى
..
اقعدوا بالعافية .. او بالراحه
محدش واخد منها حاجه
😀
مفيش LIKE في البتاع دة ؟
:))))
@مش مهم على فكره
عندك فيس بوك لايك فوق اهو 😀 😀