– وانت عيل صغير:
ﻻ كدا عيب .. انت قليل الادب .. متلعبش مع الواد دا .. لو حد اتصل قوله اننا مش موجودين
مفيش لعب ايام الامتحانات .. ﻻ مفيش رياضه .. الواد احمد -ابن الجيران- اشطر منك يا خايب
منتاش نافع
..
– وانت في الجامعه:
بتشيل مواد .. هي كليتك دي كليه اصلا .. هو انت هتطلع من كليتك دي هتشتغل ايه
يبني زاكر وسيبك من الكمبيوتر دا اقعد زاكر .. الواد احمد دخل كلية طب
وهيطلع دكتور اد الدنيا وانت رايح تدخلي (…) .. برضه منتاش نافع
..
– بعد ما تتخرج وتبقى شحط وتشتغل في القاهرة:
يبني حوش قرشين ينفعوك .. هو انت مرتبك كام .. احكيلنا بتعمل ايه في الشغل
مين بيشتغل معاك .. الواد احمد (هو احنا مش هنخلص من السيرة دي بقى) ماله ؟؟ بقى دكتور وخطب
خلي بالك من العيال اللي قاعده معاك في الشقه .. شوف سكن قريب من شغلك
مش هتخطب بقى؟ ﻻ ! .. هو انت دماغك دي جزمة قديمة ؟ .. منتاش ناااااافع
..
– تسيبلهم البلد وتسافر :
لقيت سكن وﻻ ﻻ ؟ .. مين معاك في الشغل .. خلي بالك من ال (اي جنسية مش عاجباهم) دول ملهومشي امااان
حوش فلوس بقى .. عايزين نخطبلك (بنت مش عارف مين !)
ايه هتسافر امريكا ؟؟ لوحدك ؟؟ لييه ؟؟ هتضيع فلوسك !! هتوه هناك .. انت دماغك فردة جزمة قديمة ..
..
– ترجع اجازة تبقى متوقع انك هتبقى واحشهم ومفيش نكد وبتاع:
اول يوم في الاجازة تلاقيهم فاتحينلك اي حوارات وتتخانقوا
احنا جبنالك عروسة ، لا مش عايز اتجوز ، ايه ليييه ؟؟ انت بتعصي اوامرنا ؟؟ احنا غضبانيين عليك
هقضي الاجازة مع اصحابي ، وتسيبنا ! طب منا كنت معاكوا وبتتخانقوا معايا !
اسيب البيت يومين ، خلي بالك من نفسك وحرص على فلوسك ، اوعى حد يضحك عليك
مش هتروح تشوف العروسة بقى ؟ ﻻ ! انت بتعصانا احنا غضبانيين عليك (تاااني) … دماغك دي فردة جزمة قديمة
……..
هو انتوا ليه محسسنا اننا عيال صغيره دايما ؟؟
عارف انكوا هتفضلوا خايفين علينا وهتفضلوا شايفينا عيال صغيرة
بس ايه المانع لما تسيبونا نجرب ؟
ايه المانع لما نغلط ؟؟
هنتعلم على فكرة ؟؟
..
وياريت على الكلام اللي فوق وبس
لكنهم كمان بيتخانقوا معك علشان ارائك السياسية
طب سيبونا نقرر احنا ! مش كفاية كدا ؟
هتاخدوا زمنكوا وزمن غيركوا ؟
مش كفاية مستقبلكم الفاشل .. هو حاضرنا ؟؟
..
اعزائي جيل الأباء والأمهات جيل (اهالينا المحترم) … عذرا … سيبونا في حالنا بقى !
Leave a Reply