..
بكتب البوست دي من طيارة لندن – القاهرة
الساعة دلوقتي 9.15 مساءا .. الاحد 22 نوفمبر .. بتوقيت الارض الطاهرة لندن
بكتب البوست توثيقا لشوية وقائع حصلت الاسبوعين اللي فاتو وشوية اسئلة واجوبة علشان اوفر عليكو وعليا
انا سافرت امريكا اسبوعين .. كنت بحضر مؤتمر في سان فرانسيسكو
ورجعت برضه زي كل سنه !
الوقائع :
1- الناس دول بيشتغلوا كويس اووي وبيتعلمو جامد وبيتعلمو كل يوم حاجه جديدة
2- جيس وات ؟ الناس دي بتهاف فان في الويك اند والمصحف !
3- الناس دي عارفه ازاي تشتغل وتستمتع بحياتها وسط كل ال homeless people اللي عايشين وسطيهم ، ووسط كل الغلاء اللي هما فيه
4- كل رحلة زي دي بتضيف ليا حاجه (حاجات) جديدة
(فأرجوك ملكش فيه ومتقوليش وفر فلوسك والكلام دا .. انا عارف مصلحتي كويس .. شكرا)
5- سفرية المرة دي اكدتلي تماما اني ﻻمؤاخذه “باكل زباله في مصر” ..
ايون احنا اكلنا زباله وغالي
الناس دول عندهم اكل فعلا حلو ، وفي منه الصحي وفي منه ال غير صحي بالمره
بفكر جديا في موضوع اني ابقى vegetarian
6- المصريين اللي معاهم الجنسيه وعايشين هناك .. جدعان اووي
(طيب ماشي .. بلاش نعمم علشان محدش يدخل يشتمني)
كل حته فيها الحلو والوحش بس انا قابلت انضف وانقى مصريين وناس بتساعدك من غير اي مقابل
…
شوية اسئلة واجاباتها :
– ايه دا انت سافرت ؟ اه يا ندل .. طب مقولتش ليه ياعم ؟
— اه سافرت اسبوعين نيوريورك وسان فرانسيسكو وجيت … لو كنت قولتلك كنت هتيجي يعني ؟ مش عايز اعرف الرد
..
– سؤال امريكا غيرتك ، لما يشوفوني اتأخرت عن صلاة الجماعه ، او لما بيشوفوني بشرب قهوة ، او لما بيشوفوني لابس خفيف في الشتا ، او لابس شورت في الصيف ..
كل سنة بيتقالي البق الحمضان دا والردود كالآتي :
— انا لسه بصلي بس اعتبرني سَهيت يا اخي .. فكرني مش تقولي انت بطلت تصلي !!
— انا مبشربش قهوة فعلا ، بس ال jetlag بيحصلي في امريكا ولما برجع ، ف خلاني اشرب كميات قهوة كتيره علشان افضل صاحي بالنهار وارجع انام بليل
— اه الجو كان سقعه هناك شوية ، هاخد وقت وهتلاقيني رجعت بسألك (لو انت من اصحابي المقربين) : هو لو انا عايز اشتري كلسون اجيبه منين ؟
— انا طول عمري بلبس شورت في الصيف والله !
ووالله امريكا لو كانت غيرتني مكنتش رجعت ..
انا رجعت قاعد معاكو اهو
شكرا على حسن استماعكم ونشوفكو السنة الجايه في اي حته !
Leave a Reply